Республиканың Роспотребнадзор идарәсендә яман шеш китереп чыгарырдай вируслар турында сөйләгәннәр. В гепатиты һәм кешедә папиллома вирусы (ВПЧ) яман шешләргә китерә, дип яза «КП-Казань».

Мәсәлән, ВПЧ аналык җиңсәсендә һәм башка органнарда ракка җирлек әзерләргә мөмкин. Бу вирусның әлеге яман шеш төренә бәйлелеген 1980 нче елларда немец тикшеренүчесе Харальд цур Хаузен раслаган. Әлеге ачыш профилактик прививкалар булдыру өчен нигезгә әйләнгән һәм Нобель премиясе белән билгеләнгән. ВПЧны кисәтү өчен 2006 елдан бирле вакцинация кулланылып килә.

Роспотребнадзор идарәсендә билгеләп үтелгәнчә, В гепатиты куркынычын киметүгә дә прививкалар ярдәм итә.